རྩུམ་དང་ནུབ་རིའི་ཡུལ་གྱི་བུད་མེད་ཀྱི་ཆེད་དུ་སློབ་གསོ་དང་ཡོང་འབབ་ཀྱི་ལས་འཆར་དུ་མ་ཞིག་དང་བཅས་H.E.L.P.་ཞབས་ཞུ་ཚོགས་པ་འདིས་ཧ་མ་ལ་ཡའི་སྐྱེས་པ་རྣམས་ལའང་ས་གནས་ཀྱི་སྤྱི་ཚོགས་ལ་ཕན་ཐོགས་ཡོང་བ་ལ་སློབ་གསོ་དང་། ནུས་རྩལ། ལས་ཀ་སོགས་མཐུན་རྐྱེན་སྦྱོར་བའི་ལས་འགུལ་གསར་པ་ཞིག་བྱས་ཡོད།

H.E.L.P.་ཞབས་ཞུ་ཚོགས་པས་བལ་ཡུལ་གྱི་NATAHM་ཚོགས་པ་དང་ནུབ་རིའི་གྲོང་སྡེ་ལས་ཁུངས་དང་བཅས་ལས་ཀ་བྱེད་པའི་གོ་སྐབས་ཡོང་བའི་ཆེད་དུ་སྤྱོང་བརྡར་གྱི་ལས་རིམ་གསར་པ་གཉིས་བསྐྲུན་ཡོད་ལ། དེས་ཀྱང་རྒྱལ་ཁབ་ཀྱི་ལག་ཁྱེར་ཐོབ་པ་ལ་ས་གནས་ལམ་སྟོན་པའི་སྦྱོང་བརྡར་དང་། རི་ལུང་རྒྱང་བགྲོད་ཀྱི་དོས་འཁྱེར་ལམ་སྟོན་པའི་སྦྱོང་བརྡར་གཉིས་སྤྲོད་ཀྱི་ཡོད།

སྔོན་མར་ཡུལ་དེར་གནས་ཚུལ་དང་ཡོང་འབབ་སྤེལ་བའི་གོ་སྐབས་འདི་ལྟར་མེད་ལ། ས་གནས་ཀྱི་དགོས་མཁོ་དང་བསྟུན་ནས་ཉམས་མྱོང་ལ་བརྟེན་པའི་ལས་རིམ་འདིས་ཤེས་ཡོན་མེད་པའི་ས་གནས་ཀྱི་སྐྱེས་པ་རྣམས་ལ་ལམ་སྟོན་པའི་དཔང་རྟགས་དང་ལག་ཁྱེར་སོགས་ཐོབ་རྒྱུ་ཡོད་པའི་གོ་སྐབས་སྤྲོད་ཀྱི་ཡོད། གཞུང་གི་ལམ་སྟོན་པའི་ལག་ཁྱེར་སྤྲོད་པའི་ལས་རིམ་ལ་མཚོན་ན་ས་གནས་ལམ་སྟོན་པ་བྱེད་པ་ལ་ལོ་རིམ་བཅུ་པའི་བར་དུ་ལོན་པའམ་རི་ལུང་རྒྱང་བགྲོད་དོས་འཁྱེར་ལམ་སྟོན་པ་བྱེད་པ་ལ་ལོ་རིམ་བཅུ་གཉིས་པའི་བར་དུ་ལོན་པའི་ཤེས་ཡོན་ཅན་རྣམས་མ་གཏོགས་གཞན་ལ་སྤྲོད་ཀྱི་མེད། འོན་ཀྱང་ཡུལ་འདིའི་སྐྱེས་པ་རྣམས་ལ་ཕལ་ཆེར་ཤེས་ཡོན་དེ་ལྟར་མེད།

NATAHM་ཚོགས་པས་ཤེས་ཡོན་གྱི་ལས་རིམ་རྩེ་ཕུད་སྒྲུབ་རྒྱུར་འགོ་བཙུགས་ནས་ལོ་༣༥་ལྷག་ཙམ་ཕྱིན་ཡོད། དེ་ལ་ཡང་ཁོང་ཚོས་སྭི་སི་ཡུལ་དང་ཕ་རན་སི་ཡུལ་དུ་བརྗེ་ལེན་གྱི་ལས་རིམ་ཡང་སྒྲུབ་ཀྱི་ཡོད། ལས་རིམ་འདིས་ལས་ཀ་ལོ་བཞི་བྱས་པས་མཉམ་ཞུགས་པ་རྣམས་ལ་ལག་ཁྱེར་ཐོབ་རྒྱུ་ཡོད་པའི་སྦྱོང་བརྡར་སྤྲོད་ཀྱི་ཡོད། མཉམ་ཞུགས་པ་རྣམས་ལ་ལམ་སྟོན་པའི་སྦྱོང་བརྡར་སྤྲོད་པར་མ་ཟད་ཡུལ་མི་གཞན་དང་བཅས་ནང་ཆོས་ངོ་སྤྲོད་དང་སྒོམ་ཁྲིད་སོགས་ལའང་མཉམ་ཞུགས་བྱེད་དུ་འཇུག་གི་ཡོད།