དགོན་པའི་དབུ་ཁྲིད་རྣམ་པ།

མཁན་པོ་པདྨ་འོད་ཟེར་གྱི་ངོ་སྤྲོད་སྙིང་བསྡུས།

སྙིགས་ལྔའི་རང་མཚང་བདོ་བའི་ནམ་ཟླ་འདིར།།

སངས་རྒྱས་བསྟན་པ་འཛིན་ལ་འགྲན་མེད་ཞིག ། 

བྱིན་རླབས་ཚན་ཁ་མ་ཉམས་གཅིག་པུ་བ། །

བྱམས་མགོན་རྡོ་རྗེ་འཆང་དབང་སྤྱི་བོར་བརྒྱན། །

གུས་པ་པདྨ་འོད་ཟེར་ནི་བལ་བོད་གཉིས་ཀྱི་ས་མཚམས་ཙུམ་འབུར་ཇི་ཞེས་པའི་ཡུལ་དུ་ཕ་ཟླ་བ་རྡོ་རྗེ་དང་མ་པ་སངས་ལྷ་མོ་གཉིས་ཀྱི་བུ་རུ་སྤྱི་ལོ་ ༡༩༨༨ ཟླ་བ་ ༡ ཚེས་ ༢ ཉིན་སྐྱེས།  ང་ཚོའི་ལུགས་སྲོལ་ཞིག་ལ་ཕ་མ་ཚོས་རང་གི་བུ་ཕྲུག་ཚོའི་མ་འོངས་པའི་མདུན་ལམ་དང་། མི་ཚེའི་བདེ་སྐྱིད་ཆེད་གཉེན་སྒྲིག་གི་ཁ་ཆད་ཆུང་དུས་ནས་བྱེད་སྲོལ་ཡོད་པ་བཞིན་ང་ལའང་ཕ་མ་གཉིས་ཀྱིས་ན་ཚོད་མཐུན་པའི་བུ་མོ་གཅིག་དང་ཁ་ཆད་བྱས། འོན་ཀྱང་མ་དྲིན་ཆེན་གློ་བུར་དུ་ནད་གཞི་ལྕི་མོ་ཞིག་གིས་སྐུ་ཚེ་མ་ཟིན་པ་ལ་བརྟེན་ནས་སྡུག་བསྔལ་ཚད་མེད་སྐྱེས།   དྲིན་ཅན་གྱི་ཨ་མ་གྲོངས་ནས་རིམ་བཞིན་ང་རང་ཡང་ནར་སོན་སྐབས་ཕ་ཡུལ་དུ་བསྡད་འདོད་ཀྱི་འདུན་པ་ཡེ་ནས་མ་བྱུང་། དམ་པའི་ཆོས་བྱེད་འདོད་ཀྱི་འདུན་པ་དྲག་པོས་ཕ་ཡུལ་རྒྱབ་ཏུ་བསྐྱུར་ཏེ་ཕྱིན། དེ་ནས་དགོན་པའི་ཆོས་སྒོ་རུ་ཞུགས་ཏེ། དགོན་པའི་སྒྲིག་གཞི་ལྟར་འབྲི་ཀློག་སོགས་ལ་སློབ་སྦྱངས་བྱས། སྐབས་དེར་དགེ་ཚུལ་གྱི་སྡོམ་པ་༸སྐྱབས་རྗེ་བསྟན་དགའ་རིན་པོ་ཆེའི་སྐུ་མདུན་ནས་ཞུ་རྒྱུའི་སྐལ་བཟང་ཞིག་མངོན་དུ་གྱུར། དེའི་རྗེས་རང་གི་རྩ་བའི་བླ་མ་༧སྐྱབས་རྗེ་ཡོངས་དགེ་མི་འགྱུར་རིན་པོ་ཆེས་བཀའ་མངགས་བཞིན་གདན་ས་ཆེན་པོ་དཔལ་སྤུངས་ཤེས་རབ་གླིང་དུ་ཕྱིན་ནས་དགེ་བའི་བཤེས་གཉེན་ཆེན་པོ་དུ་མའི་མདུན་ནས་གཞུང་ཆེན་བཀའ་པོད་ལྔ་སོགས་སློབ་གཉེར་མཐར་ཕྱིན་བྱེད་པའི་གོ་སྐབས་བཟང་པོ་ཞིག་ཐོབ་པ་མ་ཟད། ༸གོང་ས་མཆོག་གི་སྐུ་མདུན་ནས་སྤྱོད་འཇུག་དང་། ༸དཔལ་རྒྱལ་བའི་དབང་པོ་ཀརྨ་པའི་སྐུ་མདུན་དུ་ཕྱག་དཔེ་བགྲོ་གླེང་སོགས་ཀྱི་སྐོར་ཟླ་ངོ་གཅིག་ཙམ་བཅར་རྒྱུའི་སྐལ་བཟང་གི་ཉི་མ་ཤར། ༸བྱམས་མགོན་རྡོ་རྗེ་འཆང་༸ཀྭན་ཏིང་ཏཱའི་སི་ཏུ་པདྨ་དོན་ཡོད་གྲུབ་པ་མཆོག་གི་སྐུ་མདུན་ནས་བསྙེན་རྫོགས་ཀྱི་སྡོམ་པ་ཞུས།   མཛོད་ཆེན་རྣམ་ལྔ་ཆ་ཚང་དང་ངེས་དོན་ཕྱག་རྒྱ་ཆེན་པོའི་སྒོམ་ཁྲིད་སོགས་དབང་ལུང་ཁྲིད་གསུམ་ཆ་ཚང་ཐོབ།   དེ་བཞིན་སྨྲ་བར་ཟླ་མེད་གྱུར་པའི་༸སྐྱབས་རྗེ་སངས་རྒྱས་མཉན་པ་རིན་པོ་ཆེའི་སྐུ་མདུན་ནས་ཀུན་བཟང་བླ་མའི་ཞལ་ལུང་དང་། རྒྱུད་བླ་མ། མཉམ་མེད་དྭགས་པོ་ཐར་རྒྱན་སོགས་འཆད་ཁྲིད་ཐོབ།   ༸སྐྱབས་རྗེ་ཡོངས་དགེ་མི་འགྱུར་རིན་པོ་ཆེའི་སྐུ་མདུན་ནས་རིན་པོ་ཆེ་ཉིད་ཀྱིས་མཛད་པའི་མངོན་པ་མཛོད་ཀྱི་སྒོམ་རིམ་དང་། ཕྱག་ཆེན་གྱི་སྒོམ་རིམ་སོགས་ལན་མང་ཞུ་རྒྱུའི་སྐལ་བ་བཟང་པོ་ཐོབ་ཡོད། ༸སྐྱབས་རྗེ་ཡོངས་དགེ་མི་འགྱུར་རིན་པོ་ཆེའི་བཀའ་དགོངས་འགྲུབ་ཆེད་གང་ལྟར་ཉི་མ་མེ་གྲོགས་དང་ཆར་པ་ཆུ་གྲོགས་ཟེར་བའི་དཔེ་ལྟར།   མདོར་ན་སྤྱི་ལོ་ ༢༠༡༠ ནས་བཟུང་གཏེར་སྒར་འོད་གསལ་གླིང་དུ་ད་ལྟའི་བར།   གང་ལྟར་ད་ལྟའི་བར་དུ་སློབ་མ་མང་པོར་བསྡུས་རྟགས་བློ་གསུམ་ནས་བཟུང་གཞུང་ཆེན་བཀའ་པོད་ལྔ་སོགས་ཀྱི་དཔེ་ཁྲིད་ཁོ་ནར་འབད་པ་བྱས་ཤིང་། ལས་ཐོག་མཁན་པོ་ལོ་ཤས་གོང་ཚར་གཅིག་འཁེལ་ཟིན་ཡང་། སླར་ཡང་དགེན་ལས་ཚང་མ་ལྷན་འཛོམས་ཐོག་ལས་ཐོག་མཁན་པོ་ཡང་བསྐྱར་བྱ་དགོས་པའི་རེ་བསྐུལ་ཡང་ཡང་གནང་བར་བརྟེན། རང་ནུས་གང་ལྕོགས་ཀྱིས་བསྟན་པ་ལ་ཞབས་ཞུ་ཅི་ནུས་སྒྲུབ་ཁུལ་བྱེད་བཞིན་མཆིས།  ད་ལྟའི་ཆ་ཕྱི་མིག་ཅིག་བལྟས་སྐབས་ཧ་ཅང་དགའ་ཚོར་ཆེན་པོ་ཞིག་བྱུང་དང་འབྱུང་བཞིན་པ་ནི།  དེ་སྔོན་རང་ངོས་ནས་བསྡུས་སྒྲ་བློ་རྟགས་ནས་གཞུང་ཆེན་བར་གྱི་སློབ་ཁྲིད་བྱ་ཡུལ་སློབ་མ་དག   ད་ལྟའི་ཆ་ཤེས་བྱའི་དཀྱིལ་འཁོར་ལ་བློ་གྲོས་ཀྱི་གཤོག་རྩལ་རྒྱས་ཏེ་གཞུང་ཆེན་སོགས་དཔེ་ཁྲིད་བྱེད་པའི་སློབ་དཔོན་གང་མཚམས་ཤིག་སྐྱེས་བསྲིངས་བྱུང་བ་ནི་གྲུབ་འབྲས་ཆུང་ཆུང་ཞིག་མངོན་དུ་གྱུར། དེ་བཞིན་རྒྱུན་ལྡན་རང་ངོས་ནས་བླ་མ་དམ་པ་རྣམས་ཀྱིས་ཞལ་གསུང་འཆི་སོས་ཀྱི་བདུད་རྩི་ལྟ་བུའི་གདམས་ངག་དང་མན་ངག་ཐོབ་པ་རྣམས་ཐོས་བསམ་སྒོམ་གསུམ་གྱི་སྒོ་ནས་རང་རྒྱུད་ལ་སྦྱར་གང་ཐུབ་ཀྱི་འབད་འབུངས་ལྷད་མེད་བྱེད་བཞིན་བཅས་སོ། །

གུས་མཁན་མིང་ཙམ་འཛིན་པ་པདྨ་འོད་ཟེར་ནས་སྤྱི་ལོ ༢༠༢༢/ ཟླ ༠༩ / ༠༥ ཉིན་བྲིས།